http://www.philstar.com/Article.aspx?articleId=625416&publicationSubCategoryId=92
MANILA, Philippines - Umabot sa 153 bagong kaso ng HIV/AIDS infections ang naitala ng Department of Health (DOH) nito lamang mga nakaraang araw na nagresulta sa paglobo sa 1,201 ang bilang ng mga taong positibo sa naturang nakamamatay na sakit sa bansa mula Enero hanggang Setyembre ngayong taon.
Batay sa 2010 HIV and AIDS registry ng DoH, ang 153 bagong HIV/AIDS infections ay mas mataas kumpara sa 56 noong 2009.
Ang kalahati o 77 ng sakit ay mula sa National Capital Region (NCR) at tatlo sa mga ito na pawang mga lalaki, ay kumpirmadong full-blown AIDS na ng maiulat sa ahensiya.
Sa kabuuang 1,201 positibong kaso ngayong 2010, nasa 15 ang full-blown AIDS na karamihan ay nahawa dahil sa pakikipagtalik. Dalawa na rin ang namatay ngayong taon.
Bukod sa sexual contact, kalimitang sanhi ng pagkahawa ng sakit ay mother-to-child transmission, blood transfusion, injecting drug use, at needle prick injuries.
No comments:
Post a Comment